Pas 11 vitesh gjendet identiteti i vertete.

[Edmondi]

Itali, gjendet i vdekur pas 11 vitesh i riu nga Kukësi

• Zbulohet në Itali një histori e dhimbshme shqiptare. Një 17 vjecar, kishte humbur jetën në Itali 11 vjet më parë, por ishte varrosur si qytetar kosovar. Vetëm pas një dekade familja shqiptare nga Kukësi mëson të vërtetën. Version multimedial i ketij lajmi

ITALI - Një histori e dhimbshme shqiptare është zbuluar pas një dekade në Itali. Një familje shqiptare që 11 vjet më parë dërgoi djalin e saj përtej detit, nuk ka rreshtur përgjatë gjithë kësaj kohe së kërkuari. Por tani mësoi se pikërisht pas mbërritjes në Itali ka humbur jetën në një aksident tragjik. Vetëm pas një dekade kësaj familje nga Vranishti i Kuksit i shuhen shpresat për ta gjetur të gjallë, ndërsa akoma më i dhimbshëm është fakti që prej kaq kohësh trupi i tij është prehur në tokën italiane, nën një tjetër identitet. Historia nis në vitin 1998, kur Besnik Paca, vetëm 17 vjeç u nis drejt Italisë për një jetë më të mirë. I riu vdiq në një aksident hekurudhor por drama nuk përfundoi këtu. Pikërisht, në këtë kohë, në Itali u gjet një dokument i lëshuar nga autoritetet serbe, që fliste për një qytetar kosovar me të njëjtin emër Besnik Paca, që kishte lindur në Gjakovë. Duke iu referuar këtij dokumenti autoritetet italiane të zonës së Barletës e varrosën djaloshin fatkeq si shtetas kosovar. Më pas ngjarja merr një drejtim krejt tjetër. Policia shqiptare nëpërmjet interpolit shpall në kërkim shqiptarin Besnik Paca, i lindur në Vranisht të Kukësit, pasi që në 1998 familja kishte humbur kontaktet me të. Policia italiane merr në dorë edhe një filmim të të afërme te Besnikut dhe e krahason me një foto në varrin e të riut kosovar në Itali dhe lindin dyshimet se bëhet fjalë për të riun shqiptar. Më pas, dy të afërm të Besnikut nga Londra konfirmojnë se viktima i varrosur si shtetas kosovar është pikërisht Besniku nga Shqipëria. Tashmë pas 10 vitesh, trupi i djaloshit do të kthehet në Shqipëri. E nga gjithë kjo histori e dhimbshme mbetet të thuhet se të paktën familjarët do të kenë një varr ku ta qajnë djalin e tyre. Ka edhe dyshime për mënyrën se si ka vdekur djaloshi, megjithatë kjo çështje e hershme tani është mbyllur. Është një dramë më shumë për familjet shqiptare, fëmijët e të cilëve u nisën për një jetë më të mirë, por nuk u kthyen kurre.